Qataat

Tu sahil hai qismat mein sehra se badtar
samundar kinare jaley ja raha hai
judai mein jiss ki teri aankh num hai
bhula ke tumhein woh chala ja raha hai

Na teri khata hai na meri khata hai 
Tha qismat mein likha jo kuch bhi huwa hai
khushi teri hissey ki tujh ko mili hai
Keh gham meri hissey ka mujh ko mila hai

Kuch poochaney se pehlay meri chashm-e-tar to dekho
Kis ne kaha keh hum ko koi talab nahi hai
Phir bhi jo padh na paao to hum to yeh kaheen ge
Yeh shair wair kehna yunhi be sabab nahi hai

Ho sake Gar

Kero qatl mujh ko ya zinda jala do
Jo chaho muhabbat ki mujh ko saza do
Jala do muhabbat mein jaltey dilon ko
Dilon mein basi nafraton ko hawa do
Magar kuch bhi kerney se pehlay jahan se
Muhabbat ka naam-o-nishan bhi mita do